U përfshi në çështjen e Shtetit Bektashi, DASH shkarkon të dërguarin e posaçëm të Trump, Paolo Zampollin

Lajmi u bë publik më 15 tetor, pasi Politico raportoi për një konflikt disamujor mes dy zyrtarëve, i cili ishte zhvilluar përmes komunikimeve të brendshme elektronike. Sipas The Times, një zyrtar amerikan konfirmoi se Zampolli ishte larguar nga detyra pas publikimit të këtyre mesazheve.

Në qendër të përplasjes qëndronte kufiri i kompetencave të Zampollit. Landau e kishte paralajmëruar vazhdimisht që të përqendrohej vetëm te diplomacia kulturore dhe të mos ndërhynte në çështje të tjera të politikës së jashtme apo në iniciativa ekonomike e tregtare pa autorizim.

“Nuk keni autoritet të angazhoheni në çështje të politikës së jashtme jashtë diplomacisë kulturore”, i shkruante Landau në një prej mesazheve të publikuara.

Në një tjetër komunikim, zëvendëssekretari i Shtetit paralajmëronte se veprimet jashtë mandatit zyrtar mund ta ekspozonin Zampollin ndaj masave disiplinore, shkarkimit dhe përgjegjësisë ligjore.

Sipas raportimeve, shkëmbimi i email-eve përfshinte akuza të ndërsjella, pretendime për rrjedhje informacioni drejt mediave dhe kërcënime për shpifje. Landau i cilësoi disa prej mesazheve të kolegut si të çuditshme, shpifëse dhe të papërshtatshme për t'u shpërndarë gjerësisht përmes postës elektronike.

Zampolli i mohoi akuzat për shkelje të ligjit dhe deklaroi për Politico se nuk ishte aspak i befasuar nga largimi i tij pas publikimit të artikullit. Ai argumentoi se emërimi dhe shkarkimi i tij varen nga presidenti amerikan.

Nga agjent modelesh te rrethi i ngushtë i Trumpit

Paolo Zampolli, sipërmarrës me origjinë italiane dhe ish-agjent modelesh në Nju-Jork, njihet prej vitesh për lidhjet personale me Donald Trumpin dhe familjen e tij.

Në vitet 1990, ai themeloi agjencinë e modelimit ID Model Management. Në vitin 1998, Zampolli prezantoi Melania Knauss, e cila më vonë u bë Melania Trump, me Donald Trumpin gjatë një feste në Nju-Jork.

Gjatë presidencës së parë të Trumpit, Zampolli u emërua në bordin e Qendrës Kennedy. Në mandatin e dytë të presidentit republikan, ai mori detyrën e të dërguarit të posaçëm amerikan për partneritetet globale, me përgjegjësi që përfshinin përfaqësimin e SHBA-së në aktivitete ndërkombëtare kulturore dhe zhvillimin e bashkëpunimeve me partnerë të huaj.

Megjithatë, sipas komunikimeve të publikuara, Landau pretendonte se Zampolli kishte tejkaluar vazhdimisht kufijtë e këtij mandati.

Polemika edhe për një çështje familjare

Largimi nga detyra vjen disa muaj pas një tjetër polemike që përfshiu Zampollin. The New York Times raportoi më herët se ai dyshohej se kishte kërkuar përfshirjen e autoriteteve amerikane të imigracionit (ICE) në çështjen e kujdestarisë së djalit të tij, në një konflikt me ish-partneren Amanda Ungaro.

Sipas raportimit, Ungaro, shtetase braziliane, ndodhej në paraburgim në Miami për akuza që lidheshin me mashtrimin, ndërsa palët ishin të përfshira në një mosmarrëveshje për kujdestarinë e djalit të tyre adoleshent.

Zampolli e ka mohuar se ka kërkuar ndalimin e saj nga autoritetet e imigracionit. Ai ka akuzuar gjithashtu Landau se qëndronte pas publikimit të këtij informacioni, pretendim që zëvendëssekretari i Shtetit e ka mohuar kategorikisht.

Shkarkimi i Zampollit shënon fundin e një emërimi të mbështetur te lidhjet e tij të hershme me Trumpin, por edhe pasojat e një konflikti të brendshëm që nxori në pah mosmarrëveshjet mbi autoritetin dhe kufijtë e rolit të tij në diplomacinë [email protected]