Ndizet revolta edhe në Kurbin, të rinjtë i vendosin zjarrin bashkisë: Rama në burg

Një grup gjimnazistësh në qytetin e Elbasanit është rikthyer mëngjesin e kësaj të hëne në protestë, duke u mbledhur në bulevardin kryesor të qytetit dhe duke marshuar më pas përgjatë akseve kryesore rrugore.

Përmes thirrjeve dhe mesazheve të tyre, të rinjtë u janë drejtuar bashkëmoshatarëve, studentëve dhe qytetarëve të Elbasanit, duke i ftuar t’u bashkohen në shenjë solidariteti me protestën antiqeveritare që po zhvillohet prej javës së kaluar në kryeqytet.

Gjatë marshimit, protestuesit kanë përsëritur thirrjet politike: “Rama, jep dorëheqjen!”, duke shprehur qëndrimet e tyre kundër klasës politike.

Rikthimi i gjimnazistëve në rrugët e qytetit vjen në një moment kur protesta në Tiranë vijon të tërheqë vëmendjen publike.

Një pjesë e nxënësve në Mirditë i janë bashkuar bojkotit të procesit mësimor, ndërsa protestat janë zhvendosur edhe në qytetin e Rubikut, ku të rinjtë kanë dalë në Rrugën e Kombit.

Protestuesit kanë bllokuar rrugën dhe kanë djegur goma, duke shprehur pakënaqësinë e tyre me thirrjet “Rama, jep dorëheqjen”.

Situata në Rubik shënon zgjerimin e protestës, ndërsa bojkoti i mësimit në Mirditë tregon se edhe nxënësit po i bashkohen reagimeve.

“Punonjësit e Ministrisë së Arsimit nuk kanë ndaluar asnjë ditë punën, qoftë fizikisht, qoftë online për shkak se një pjesë e zyrave janë të dëmtuara. Gjatë fundjavës kemi qenë në komunikim pa pushim me sistemin tonë arsimor që java të rifillojë në të gjitha shkollat, ku ju presin krahëhapur mësuesit, drejtuesit, oficerët e sigurisë, punonjësit socialë. Jemi të gjithë në krye të detyrës. Dua t’u shpreh mirënjohjen time më të thellë të gjithë mësuesve për gjithë përkushtimin e dhënë dhe kohën jo vetëm për fëmijët, por për komunikimin me prindërit”, tha Kumbaro, shkruan A2.

Ndërkohë, Ministrja Mirela Kumbaro ka pasur një mesazh edhe për prindërit: “Të dashur prindër, kini besim te mësuesit. Por sidomos flisni me fëmijët tuaj. Çdo orë që ua merr dhuna, çdo minutë që shohin vandalizmat që i janë bërë qytetit tonë në rrjetet sociale, janë orë të humbura nga jeta e tyre. Koha e tyre është për edukim. Shkollat janë të hapura dhe në funksion të plotë.”

Ministrja e Arsimit u është drejtuar edhe studentëve, duke i ftuar për dialog: “Studentë, kemi qenë në komunikim, edhe individualisht, gjatë gjithë këtij viti në këtë detyrë ku jam, dhe dua t’ju garantoj se dera e Ministrisë është e hapur, por edhe zemra e punonjësve të Ministrisë së Arsimit është e hapur. Gjërat bëhet me zemër dhe me dëshirë për të ecur përpara. Në çdo çast jam gati të ulemi bashkë dhe të përmirësojmë gjithçka që duhet bërë”.

Një pjesë e tyre janë futur në mësim, ndërsa të tjerë kanë zgjedhur t’i bashkohen bojkotit, në kuadër të protestës studentore, shkruan A2.

Pas orës 11:00 pritet të ketë një grumbullim të studentëve pranë rektoratit, ndërsa mbetet për t’u parë nëse ata do të organizohen për të vijuar protestën.

Ndërkohë, forcat e policisë ndodhen pranë fakulteteve, ku po marrin masa paraprake për të garantuar rendin dhe sigurinë gjatë zhvillimit të protestës.

Të rinjtë kanë drejtuar thirrje edhe ndaj efektivëve të policisë, duke kërkuar që ata të heqin kapelet. Sipas raportimeve nga protesta, në disa raste policia ka përdorur dhunë ndaj protestuesve.

Protesta në Shkodër zhvillohet në një kohë kur Shqipëria është përfshirë prej shtatë ditësh nga protesta masive, ku të rinjtë dhe qytetarë të tjerë kërkojnë dorëheqjen e Edi Ramës dhe mbajtjen e përgjegjësisë politike e ligjore nga drejtuesit e vendit.