“Po na vjedhin, boll më!”/ Pedagogu përballet me policët në protestë: Rama nuk e mban më! Ajo “Bela” ka miliona, ju nuk keni bukë në shtëpi. Nuk shkon më kështu

Pedagogët janë ndaluar na forca policie për t’ju bashkuar protestës së studentëve para Kuvendit të republikës së Shqipërisë.

“Çfarë do të bëni, mundje me pedagogët. Do bësh grusht me pedagogun? E fiton mo grushtin me pedagogun”, kështu është shprehur një prej pedagogëve drejtuar policëve.

Një prej pedagogëve ka hequr edhe kangjellat që ishin vendosur për të penguar kalimin e tyre.

Studentët dhe pedagogët kanë dalë sërish këtë të enjte në protestë kundër qeverisë së kryeministrit Edi Rama, duke vijuar për të dhjetën ditë radhazi mobilizimin e tyre.

Protestës së sotme i janë bashkuar edhe studentët e Universitetit të Mjekësisë, të cilët kanë dalë në mbështetje të kërkesave të të rinjve për dorëheqjen e kreut të qeverisë.

Studentët dhe të rinjtë janë mbledhur përpara godinës së Kuvendit, ndërsa brenda sallës po zhvillohet seanca plenare, e shoqëruar me tensione dhe përplasje mes deputetëve të mazhorancës dhe opozitës.

Pavarësisht situatës së tensionuar, deputetët socialistë po vijojnë me votimin e përshpejtuar të projektligjeve të parashikuara në rendin e ditës.

Pas organizimit përpara Korpusit Qendror të Universitetit Politeknik të Tiranës, në vijim të protestave kundër qeverisë së kryeministrit Edi Rama, pedagogët kanë nisur marshimin drejt Kuvendit në mbështetje të studentëve.

Një ditë më parë, pedagogët njoftuan bojkotimin e mësimdhënies në universitetet publike, vendim që do të mbetet në fuqi deri në një njoftim të dytë.

Pas grumbullimit përpara Universitetit Politeknik, pedagogët pritet të marshojnë drejt Kryeministrisë, ku do të vijojnë protestën e tyre.

Ndryshe nga studentët, të cilët janë mbledhur përpara Kuvendit, pedagogët kanë vendosur të mos u bashkohen atyre në këtë tubim, por të vijojnë marshimin drejt Kuvendit.

“Studentët nuk janë vetëm”, “Kur goditet studenti , goditet e ardhmja” , “Jemi me studentët”, “Mos prekni studentët”, janë pankartat që mbajnë pedagogët.

Protesta zhvillohet në ditën e dhjetë të revoltës studentore, ndërsa pedagogët kanë shprehur solidaritetin me të rinjtë dhe kanë kërkuar dorëheqjen e kryeministrit Edi Rama.