Kreu i Sindikatës së Pedagogëve nga protesta: Kryeministri t’i thërrasë ndërgjegjes, duhet zgjidhje politike! Të ndryshojë sistemi!

Ajo theksoi se studentët, pedagogët dhe qytetarët kanë një kauzë të rëndësishme, ndërsa falënderoi rininë shqiptare që, sipas saj, ka larguar frikën. Protestuesja akuzoi pushtetin se po përdor çdo mjet për të shuar protestën.

“Fuqia e rinisë është më e madhe. Po të jemi të bashkuar, çdo gjë arrihet dhe fitohet. Kushdo që mundohet ta sabotojë këtë protestë është i mbaruar. Populli dhe profesorët kanë një kauzë të rëndësishme dhe s’ka kthim pas. Kuçedrës së kuqe i ka mbetur vetëm pak kohë dhe po përdor çdo gjë që të shuajë protestën. Qëllimi i studentëve është që të çlirohen nga kuçedra e kuqe, që të gjithë të kenë shanse të barabarta. E falënderoj rininë shqiptare, e cila në radhë të parë hoqi frikën. Mos kini frikë, deri në qëllimin përfundimtar, deri në arritjen e asaj që kemi kërkuar”, u shpreh ajo.

Pedagogët kanë shprehur mbështetjen e tyre për studentët, duke u solidarizuar me ta dhe kauzën e tyre, për uljen e tarifave studentore, uljen e çmimeve të qirave, përmirësimin e kushteve në konvikte etj.

Revolta Studentore ka nisur që prej datës 13 tetor, ku të rinjtë u mblodhën për të protestuar pranë Ministrisë së Arsimit, ndërsa vala e protestave u përhap në të gjitha universitetet e vendit.

Universitetet po përballen nga viti në vit me mbylljen e programeve studimore, për shkak të rënies së numrit të studentëve, të cilët kanë emigruar masivisht, në kërkim të një të ardhmeje më të sigurt për veten e tyre. Tregu i punës dhe mungesa e meritokracisë i ka detyruar ata të braktisin vendin e tyre.

Burimi: balkanweb.com

Në një prononcim për mediat, Olldashi u shpreh se pedagogët duhet të ishin bashkuar me studentët që në ditën e parë të protestës. Sipas saj, prania e tyre në shesh është një mënyrë për t’u treguar të rinjve se nuk janë vetëm në kërkesat dhe kauzën e tyre.

Ajo kritikoi gjithashtu mënyrën se si, sipas saj, kryeministri Edi Rama komunikon me publikun, duke e cilësuar atë si një formë monologu dhe jo dialogu.

Olldashi ironizoi edhe angazhimin e kryeministrit në politikë, duke thënë se mund t’i rikthehet një ditë Akademisë së Arteve.

Në përfundim, ajo u ndal te rëndësia e reagimit të të rinjve, duke theksuar se përtej protestës dhe revoltës, kjo lëvizje duhet të shërbejë edhe si një thirrje për reflektim.

“Kam përshtypjen se ju gazetarët keni qenë syri i të gjithë shqiptarëve dhe besoj se duhet të jua bëj unë pyetjen çfarë është duke ndodhur? Pedagogët duhet të ishin në shesh me studentët që ditën e parë. Por edhe thirrja që ne kemi bërë të bashkohemi do të thotë të bashkohemi si grup i vetëm për ti treguar studentëve që jemi me ta, Dhe sot është për të treguar që ne jemi këtu me ju për ju. Kuptimi i fjalës dialog është e kundërta e fjalë monolog dhe nëse gjatë gjithë kohës ka pasur monolog do të thotë që nuk ka vend për dialog. Në fakt Rama ka bërë monolog dhe është one men show dhe e bën shumë bukur atë rol dhe e ka perfektë. Dhe besoj se në ndonjë moment të jetë do i kthehet akademisë së arteve. Kryeministri i sotëm dua ti kujtoj se është kryeministri që ka protestues dhe është rrahur. Vetë ka qenë protestues. Unë nuk jam pjesë e oborrit perandorak të tij, por rinia përveç këtij manifestimi apo revolte të arrij t’i nxjerrë ndërgjegjen në pah, ai duhet të jetë falënderues”, tha ajo.

Protestuesit kanë vijuar thirrjet “Dorëheqje!”, duke kërkuar largimin e kreut të qeverisë. Karriget e vendosura për dialog janë hedhur në shenjë kundërshtimi ndaj ftesës së tij.

Kjo është dita e nëntë e protestës studentore, ndërsa të rinjve u janë bashkuar edhe pedagogët, të cilët kanë nisur sot bojkotin e mësimdhënies në universitetet publike, sipas vendimit të sindikatës.

Përpara mbërritjes te Kryeministria, studentët dhe pedagogët u mblodhën pranë Universitetit Politeknik të Tiranës dhe më pas nisën marshimin në bulevard.

Vendimi u mor njëzëri nga kryesia e sindikatës, më 20 tetor, ndërsa bojkoti nis më 21 tetor dhe do të vijojë deri në një njoftim të dytë.

Në njoftimin zyrtar, sindikata shprehet se studentët protestojnë prej muajsh për arsim cilësor, shëndetësi dinjitoze, sigurinë e jetës dhe pronës, si dhe llogaridhënien. Sipas saj, përgjigjja ndaj kërkesave të tyre ka qenë heshtja dhe, që prej 13 tetorit, edhe dhuna.

“Studentët protestojnë prej muajsh për arsim cilësor, shëndetësi dinjitoze, siguri jete e prone, për të drejtën e llogaridhënies etj. Përgjigjja që kanë marrë nuk ka qenë dialogu, por heshtja dhe, që nga 13 tetori dhe në vijim, edhe dhuna ekstreme. Pedagogët nuk mund të vazhdojnë mësimin si zakonisht, ndërkohë që studentët e tyre goditen në rrugë. Pedagogët ndajnë të njejtat opinione me studentet në lidhje me zhvillimet politike, ekonomike, korrupsionin galopant, mungesën e meritokracisë etj”, thuhet në njoftimin e Sindikatës mbi arsyet e bojkotit.

SPUSH kërkon ndalimin e menjëhershëm të dhunës ndaj studentëve dhe protestuesve paqësorë, hetim të pavarur dhe transparent për përdorimin e forcës, vënien para përgjegjësisë të personave përgjegjës, trajtimin dinjitoz të studentëve të shoqëruar dhe plotësimin e kërkesave të protestuesve.

“Kërkojmë ndalimin e menjëhershëm të përdorimit të dhunës ndaj studentëve dhe protestuesve paqësorë; Hetimin e pavarur dhe transparent në lidhje me përdorimin e forcës që nga data 13 tetor e në vijim, si dhe vënien para përgjegjësisë së atyre që e kanë urdhëruar dhe ushtruar këtë dhunë të pashembullt; Trajtimin e ligjshëm dhe dinjitoz të çdo studenti të shoqëruar; Plotësimin e kërkesave të studentëve dhe nxënësve”.

Sindikata u bën thirrje rektorëve dhe drejtuesve të institucioneve publike të arsimit të lartë të respektojnë vendimin dhe të mos marrin masa disiplinore ndaj pedagogëve dhe studentëve pjesëmarrës.

Përveç bojkotit të mësimit, pedagogët do të marrin pjesë aktivisht në protestë. Çdo ditë, në orën 10:00, ata do të mblidhen para Korpusit Qendror të Universitetit Politeknik të Tiranës për të vijuar mbështetjen ndaj studentëve.

Sindikata thekson se orët e mësimit do të kompensohen më vonë dhe u kërkon pedagogëve të qëndrojnë në komunikim me studentët, duke u ofruar mbështetje dhe materiale didaktike sipas nevojës.

“Bojkoti nuk është braktisje e auditorit”, thuhet në njoftim, ku theksohet se pedagogët do të rikthehen në mësim sapo studentët të marrin përgjigjen që meritojnë.