Witkoff mbërrin në Rusi për bisedime me Putinin, Kushner me grip, merr pjesë online në takim

Pas takimit të së martës me presidentin ukrainas Volodymyr Zelensky në Norvegji, Witkoff vijoi turin e tij të ngjeshur diplomatik drejt Shën Petersburgut. CNN raporton se në aeroportin Pulkovo ai u prit nga i dërguari i Kremlinit, Kirill Dmitriev.

Sipas agjencisë shtetërore ruse të lajmeve TASS, takimi mes Witkoff dhe Putinit është planifikuar të zhvillohet gjatë gjysmës së parë të ditës së mërkurë.

Një zyrtar amerikan i tha CNN se SHBA dhe Ukraina shënuan “përparim domethënës” gjatë bisedimeve të së martës në Norvegji. Sipas tij, Ukraina paraqiti ide dhe propozime të reja, të cilat u diskutuan në detaje, ndërsa të dyja palët tashmë kanë një “përputhje të fortë qëndrimesh” për hapat e ardhshëm.

Ukraina dhe aleatët e saj përsëritën vijat e kuqe të përcaktuara nga Kievi për çdo negociatë paqeje. Këto përfshijnë domosdoshmërinë e garancive të ardhshme të sigurisë, për të siguruar që Rusia të mos e pushtojë sërish vendin, si dhe refuzimin e çdo kërkese për të hequr dorë nga territoret.

Rusia ka kërkuar që Ukraina të dorëzojë të gjithë rajonin lindor të Donbasit, i cili aktualisht është kryesisht nën kontrollin rus. Moska ka kërkuar gjithashtu që Ukraina të reduktojë ndjeshëm madhësinë e ushtrisë së saj dhe të angazhohet se nuk do të anëtarësohet kurrë në NATO.

Jared Kushner, dhëndri i Trumpit, i cili ka qenë gjithashtu i përfshirë në negociatat e paqes, është i sëmurë me grip dhe do të marrë pjesë në takimin në Rusi në distancë.