18 pika në rendin e ditës / Kuvendi mblidhet sot në seancë plenare!

Seanca zhvillohet në një klimë të tensionuar politike, ndërsa ende janë të freskëta përplasjet e 22 tetorit, kur deputetët e mazhorancës dhe opozitës u përfshinë në debate të ashpra, përplasje fizike dhe incidente që çuan në ndërprerjen e përkohshme të punimeve.

Gjatë seancës së kaluar deputetët demokratë bllokuan foltoren dhe kundërshtuan kalimin në votim të projektligjeve pa diskutim. Në një prej momenteve më të tensionuara, deputeti Flamur Noka i hoqi mikrofonin kreut të grupit parlamentar socialist, Taulant Balla, ndërsa më pas tentoi t’u merrte kartat e votimit deputetëve të mazhorancës.

Situata degjeneroi në përplasje mes depuitetëve, duke sjellë edhe ndërhyrjen e Gardës së Republikës. Pavarësisht kundërshtimeve të opozitës, socialistët vijuan votimin e projektligjeve, ndërsa seanca u mbyll mes tensioneve.

Përplasjet parlamentare u zhvilluan në një kohë kur jashtë godinës së Kuvendit protestonin studentë dhe qytetarë, të cilët kërkonin dorëheqjen e kryeministrit Edi Rama. Deputetët e opozitës kërkuan që në Parlament të diskutohej edhe për ndërhyrjet e policisë ndaj protestuesve dhe ndalimin e studentëve.

Pas incidenteve, Grupi Parlamentar i Partisë Socialiste kërkoi marrjen e masave disiplinore ndaj 20 deputetëve të opozitës. Për gjashtë prej tyre, përfshirë Flamur Nokën, Belind Këlliçin, Fidel Krekën, Edi Palokën, Besart Xhaferrin dhe Luçiano Boçin, socialistët kërkuan përjashtim 60-ditor nga punimet parlamentare, ndërsa për deputetët e tjerë u propozuan masa më të shkurtra disiplinore. Kërkesa iu drejtua Sekretariatit për Procedurat, Votimet dhe Etikën.

Për seancën e sotme në rendin e ditës janë përfshirë disa nisma të rëndësishme ligjore.

Një nga pikat e para është interpelanca me ministrin e Turizmit, Kulturës dhe Sportit, Blendi Gonxhja, e kërkuar nga deputetja demokrate Ina Zhupa.

Më pas, Kuvendi do të shqyrtojë projektligjin e ri “Për Bankën e Shqipërisë”, miratimi i të cilit kërkon shumicë të cilësuar votash. Në rendin e ditës është përfshirë edhe akti normativ i qeverisë i datës 25 shtator 2026, që parashikon një shtesë në ligjin për akcizat.

Një tjetër çështje është ratifikimi i marrëveshjes së bashkëpunimit financiar me Gjermaninë për vijimin e programit të rinovimit të konvikteve të universiteteve publike në Shqipëri, sipas parimeve të eficiencës energjetike.

Deputetët do të diskutojnë gjithashtu projektligjin për Këshillin Fiskal të Republikës së Shqipërisë, si dhe projektligjin për mbrojtjen e konsumatorit.

Një pjesë e konsiderueshme e rendit të ditës lidhet me ndryshimet në legjislacionin për biznesin. Kuvendi do të shqyrtojë ndryshimet në ligjin për Qendrën Kombëtare të Biznesit, ligjin për regjistrimin e biznesit dhe atë për tregtarët dhe shoqëritë tregtare.

Në të njëjtën paketë përfshihet edhe projektligji për shndërrimin, bashkimin dhe ndarjen ndërkufitare të shoqërive tregtare.

Në seancë pritet të diskutohen edhe ndryshimet në ligjin për administrimin e objekteve të konfiskuara si ndërtime pa leje, me qëllim përdorimin e tyre për interes publik ose strehim social, si dhe ndryshimet në ligjin për administrimin e pasurive të sekuestruara dhe të konfiskuara.

Një tjetër projektligj që do të shqyrtohet është ai për ndryshimet në ligjin e peshkimit.

Në pjesën e fundit të rendit të ditës janë parashikuar tre projektvendime që lidhen me organizimin dhe funksionimin e institucioneve. Dy prej tyre kanë të bëjnë me strukturën, organikën dhe klasifikimin e pagave të personelit të Komisionit Qendror të Zgjedhjeve, përfshirë punonjësit që do të angazhohen në organizimin e zgjedhjeve vendore të vitit 2027.

Projektvendimi tjetër parashikon ndryshime në strukturën organizative dhe organikën e Inspektoratit të Lartë të Deklarimit dhe Kontrollit të Pasurive dhe Konfliktit të Interesave.