Tërmet i fuqishëm 7.2 ballë në Oqeanin Paqësor, alarm për cunami! Banorët largohen nga zonat bregdetare

Një tërmet i fuqishëm me magnitudë 7.2 goditi arkipelagun e Vanuatusë në Oqeanin Paqësor, duke shkaktuar alarm për cunami dhe mobilizimin e autoriteteve lokale. Lëkundjet e forta sizmike u regjistruan në orët e para të mëngjesit, ndërsa banorëve të zonave bregdetare iu kërkua të zhvendosen drejt vendeve më të larta për shkak të rrezikut nga dallgët e mëdha.

Sipas Shërbimit Gjeologjik të Shteteve të Bashkuara (USGS), tërmeti kishte një thellësi prej vetëm 10 kilometrash nën shtratin e detit, çka rrit rrezikun e pasojave në zonat pranë epiqendrës.

Menjëherë pas lëkundjeve, Qendra e Paralajmërimit të Cunamit në Paqësor (PTWC), me seli në Hawaii, lëshoi një paralajmërim për mundësinë e valëve të rrezikshme të cunamit në brigjet që ndodhen brenda një rrezeje prej 300 kilometrash nga epiqendra. Autoritetet e Vanuatusë u kërkuan banorëve të largohen nga zonat e ulëta bregdetare, ndërsa po punohet për rivendosjen e komunikimit me komunitetet e izoluara të arkipelagut.

Vanuatu ndodhet në të ashtuquajturën “Unaza e Zjarrit” e Paqësorit, një nga zonat me aktivitetin më të lartë sizmik dhe vullkanik në botë, ku përplasja e pllakave tektonike shkakton tërmete të shpeshta dhe të fuqishme. Deri në raportimet fillestare nuk ka të dhëna të konfirmuara për viktima apo dëme materiale, ndërsa autoritetet vijojnë monitorimin e situatës.