Bullgari, Iliana Jotova kryeson bindshëm në zgjedhjet presidenciale, sipas exit poll-eve

Presidentja në detyrë e Bullgarisë, Iliana Jotova, kryeson në balotazhin e zgjedhjeve presidenciale, sipas exit poll-eve të publikuara pas mbylljes së qendrave të votimit të dielën.

Sipas agjencisë Alpha Research, Jotova dhe kandidati për nënpresident Kiril Valçev kanë marrë 52.5% të votave. Rivali i tyre, ish-kryeministri i përkohshëm Andrey Gyurov dhe kandidati për nënpresident Georgi Kandev, kanë siguruar 43.4%.

Exit poll-i i agjencisë Myara i jep Jotovës 51%, ndërsa Gyurov renditet me 44.7%. Ndërkohë, Market Links vlerëson mbështetjen për Jotovën në 50.7% dhe për Gyurov në 44%. Edhe sondazhi i Trend konfirmon epërsinë e Jotovës, me 51.6% kundrejt 43.4%.

Këto të dhëna tregojnë një epërsi të Jotovës në të gjitha sondazhet e publikuara deri tani.

Gara dhe orientimi i politikës së jashtme

Zgjedhjet presidenciale zhvillohen në një klimë debatesh për orientimin e politikës së jashtme të Bullgarisë, veçanërisht për marrëdhëniet me Rusinë dhe qëndrimin ndaj luftës në Ukrainë.

Jotova mbështetet nga partia Progressive Bulgaria e kryeministrit Rumen Radev. Gjatë fushatës, ajo ka mbështetur dialogun me Moskën dhe ka kundërshtuar ndihmën ushtarake për Ukrainën, duke promovuar një qasje të orientuar drejt negociatave.

Nga ana tjetër, Gyurov, i mbështetur nga forcat reformiste dhe pro-perëndimore, ka mbajtur një qëndrim më të qartë në mbështetje të Ukrainës. Gjatë kohës kur drejtonte qeverinë e përkohshme, ai nënshkroi një marrëveshje bashkëpunimi në fushën e sigurisë me Kievin.

Të dy kandidatët kanë dënuar sulmet me dronë ndaj anijeve tregtare në Detin e Zi dhe kanë bërë thirrje për një zgjidhje diplomatike të luftës në Ukrainë.

Pjesëmarrje e ulët në votime

Sipas exit poll-eve, pjesëmarrja në raundin e dytë vlerësohet nga 26.8% deri në 29.1%, sipas agjenciseve të ndryshme. Kjo shënon një rritje krahasuar me raundin e parë të 25 tetorit, kur pjesëmarrja ishte 22.98%, sipas Komisionit Qendror të Zgjedhjeve.

Nëse projeksionet konfirmohen nga numërimi zyrtar, Jotova do të marrë mandatin e saj të parë presidencial përmes zgjedhjeve dhe do të bëhet gruaja e parë e zgjedhur presidente e Bullgarisë.

Rezultatet përfundimtare pritet të konfirmohen nga Komisioni Qendror i Zgjedhjeve pas numërimit të votave./Cogito/