Parlamenti si kishë mesjetare që shet Indulgjenca për mëkatarët!

Parlamenti i kontrolluar nga socialistët ka shumë arsye për të hyrë në histori, por mendoj se ai do të kujtohet më së shumit për ligjet “nominale”, ligjet të bëra enkas për një individ, apo një çështje.

Deri tani kishim ligjin “Fusha” si modelin e korruptimit të ligjvënësit si institucion.

Por tashmë në krye ka dalë ligji “Sejko”, ligji që mbron guvernatorin e Bankës së Shtetit nga arrestimi, kontrolli i banesës, apo kontrolli personal nga ana e prokurorisë, nëse hetohet për një vepër penale të kryer për shkak të detyrës.

Ligji “Fusha” u bë për të mundësuar një kontratë koncensionare mes kompanisë "Fusha” dhe qeverisë, për ndërtimin e teatrit të ri, shoqëruar me disa kulla. Një nga çështjet më të debatuara në Shqipëri.

Po ligji “Sejko” çfarë arsyeje kishte që u miratua?

Përse “një ditë të bukur” parlamenti ra dakord t'i ofrojë imunitet Guvernatorit të Bankës së Shqipërisë?

Çfarë e kanos guvernatorin e bankës, që i duhet kjo mbrojtje dhe mbi të gjitha, për çfarë arsyeje parlamenti ia ofron këtë mbrojtje?

Nuk besoj se socialistët janë penduar pas 12 vjetësh për arrestimin në mes të rrugës të ish-guvernatorit Ardian Fullani dhe dëmshpërblimin e majmë që ai i mori buxhetit të shtetit pas pafajësisë.

Po sikur nesër të ndodhë e njëjta gjë, psh, me drejtorin e policisë?

Po sikur nesër parlamenti ti ofrojë mbrojtje “anti-prokurori” edhe zyrtarëve të tjerë që rrezikohen nga hetimet e SPAK?

Nga një institucion ligjvënës, parlamenti rrezikon të kthehet në një kishë mesjetare që shet “Indulgjenca” për faljen e mëkateve dhe garantimin e rrugës për në parajsë.