A u përjashtuan Spiropali dhe Ndreca nga PS? Klosi sqaron: Nuk mund të jenë më pjesë e asnjë forumi të partisë

Çështja u diskutua gjatë pjesës me dyer të mbyllura të takimit të socialistëve në Gjirin e Lalzit, ku Rama kërkoi që propozimi për përjashtimin e dy figurave të kalonte për votim. Megjithatë, kërkesa nuk u përfshi në procesin e votimit dhe Asambleja përfundoi punimet pa marrë një vendim për këtë çështje.

Gjatë diskutimeve pati edhe kundërshti ndaj qëndrimit të kryesocialistit. Deputeti socialist Fatmir Xhafaj, sipas raportimeve nga mbledhja, u shpreh kundër përjashtimit të Spiropalit dhe Ndrecës, duke propozuar që ndaj tyre të ndërmerreshin masa, por pa i larguar nga Partia Socialiste.

Një tjetër element që doli në pah pas përfundimit të takimit ishte statusi i Elisa Spiropalit në parti. Sekretari i Përgjithshëm i PS-së, Blendi Klosi, u pyet nga gazetarët nëse ish-kryetarja e Kuvendit vijon të jetë pjesë e forcës politike. Përgjigjja e tij ishte e qartë: Spiropali është ende anëtare e Partisë Socialiste.

Klosi theksoi se diskutimet e zhvilluara gjatë Asamblesë i përkasin proceseve të brendshme të partisë. Ai sqaroi se vendimmarrja e mbledhjes ishte përqendruar te miratimi i platformës “Këshilltari i bashkisë sime” dhe vijimi i përgatitjeve për fushatën elektorale në të gjithë territorin.

Edhe për Plarent Ndrecën, kërkesa e përjashtimit nuk u shndërrua në një vendim formal të Asamblesë. Ndreca, i cili është avokat i kryebashkiakut të Tiranës, Erion Veliaj, nuk ishte i pranishëm në mbledhje.

Riorganizimi i PS-së në Tiranë

Përtej debatit për dy anëtarët e partisë, Asambleja solli edhe ndryshime në organizimin e strukturave socialiste në kryeqytet. Në drejtimin e PS-së në Tiranë u caktuan Ervin Demo dhe Albana Koçiu, ndërsa zhvillimet shënojnë largimin e Erion Veliajt nga roli drejtues politik që mbante në strukturat e partisë.

Mbledhja u zhvillua në një moment tensionesh brenda kampit socialist, pas kritikave publike të Spiropalit dhe zhvillimeve që përfshijnë Veliajn.

Në përfundim, kërkesa për përjashtimin e Spiropalit dhe Ndrecës mbeti pa u votuar. Për momentin, të dy nuk janë përjashtuar zyrtarisht nga Partia Socialiste./Cogito/

Sekretari i Përgjithshëm i Partisë Socialiste, Blendi Klosi, ka dhënë detaje për vendimet e marra në mbledhjen e Asamblesë Kombëtare të PS-së, e cila përfundoi pas diskutimeve me dyer të mbyllura.

Në një prononcim për mediat, Klosi tha se mbledhja ishte pjesë e kalendarit të rregullt të Asamblesë dhe se fokusi kryesor ishte përgatitja për zgjedhjet e ardhshme. Ai bëri të ditur se PS do të hapë forumet e saj për të gjithë ata që dëshirojnë të kontribuojnë, ndërsa puna do të shtrihet në mënyrë të strukturuar në çdo qendër urbane dhe rurale.

Sipas Klosit, në këto forume do të evidentohen problematikat dhe çështjet që kërkojnë zgjidhje, me qëllim që propozimet e partisë të reflektohen në garën e ardhshme elektorale dhe në drejtimin e bashkive.

Klosi tha se Ogerta Manastirliu nuk do të largohet nga drejtimi politik i qarkut të Tiranës. Ndërkohë si bashkëdrejtues politik, për territorin e Bashkisë së Tiranës, vijnë Ervin Demo e Albana Koçiu. Ai theksoi se organizimi partiak do të mbetet i pandryshuar në strukturë, pavarësisht ndryshimeve në drejtimin e bashkive. “Sa i përket drejtimit të Tiranës, u propozuan dy bashkëkryetarë si në të gjithë bashkitë e vendit. Drejtimi i partisë së bashkisë së Tiranës do jetë nga Demo dhe Koçiu. Drejtimi politik do të vazhdojë nga Ogerta Manastirliu.”, tha Klosi.

I pyetur nga gazetarët për mundësinë e përjashtimit të Elisa Spiropalit dhe Plarent Ndrecës nga Partia Socialiste, Klosi nuk pranoi të komentonte, duke i cilësuar këto si çështje të brendshme të partisë. “Prandaj janë diskutime të brendshme. Vendimmarrja ishte për miratimin e platformës ‘Këshilltari i bashkisë sime’, miratimin e procesit për të vazhduar fushatën elektorale në çdo cep të territorit.”, u shpreh ai.

Ish-ministri Fatmir Xhafaj dhe një nga figurat më të vjetra brenda socialistëve u shpreh kundër propozimit të Ramës.

Mësohet se ai është shprehur kundër largimit të dy eksponentëve të PS nga radhët e partisë, duke u shprehur që ndaj tyre të merren masa, por jo të përjashtohen.

Në zgjedhjet parlamentare të 11 majit 2025, Partia Socialiste siguroi 83 mandate. Megjithatë, ky numër është reduktuar pas largimit të deputetes së Malësisë së Madhe, Marjana Koçeku, e cila u shkëput nga grupi parlamentar socialist për t’iu bashkuar protestave kundër qeverisë.

Nëse kërkesa për përjashtimin e Spiropalit miratohet, numri i mandateve të socialistëve do të zbresë në 81. Kjo do të thotë se PS nuk do të mund të sigurojë e vetme shumicën e cilësuar prej 84 votash, të nevojshme për miratimin e disa ligjeve dhe vendimeve të rëndësishme në Kuvend.

Në këto kushte, votat e tre deputetëve socialdemokratë të Tom Doshit do të merrnin një rëndësi vendimtare për mazhorancën. Vetëm me mbështetjen e tyre, socialistët do të mund të arrinin numrin prej 84 votash, duke e bërë Ramën të varur nga votat e aleatëve për vendimmarrjet që kërkojnë shumicë të cilësuar.

Dy emrat do të ndajnë drejtimin politik të socialistëve në kryeqytet, në një lëvizje organizative që vjen në kuadër të riorganizimit të strukturave të partisë.

Asambleja e PS-së po zhvillohet nën drejtimin e kryeministrit Edi Rama, ndërsa në fokus të diskutimeve janë organizimi i brendshëm, drejtimi politik në qarqe dhe përgatitjet për sfidat e ardhshme elektorale.

Mbledhja zhvillohet në një moment me zhvillime të rëndësishme brenda Partisë Socialiste, mes debateve politike dhe qëndrimeve të fundit të disa prej figurave të saj, mes tyre kryebashkiaku i Tiranës, Erion Veliaj.

Kujtojmë se drejtues politikë për Tiranën më parë kanë qenë Erion Veliaj dhe Ogerta Manastirliu. Ndërsa Elisa Spiropali ka drejtuar një njësi në Tiranë, sikurse edhe Erion Braçe, Fatmir Xhafaj, Damian Gjiknuri, Taulant Balla, Blerina Gjylameti, Olta Xhaçka, Ogerta Manastirliu etj.

Vetë kryebashkiaku i Tiranës në letrën drejtuar SPAK dhe Sekretarit të Përgjithshëm të PS, Blendi Klosi, kërkoi të merrte pjesë në punimet e Asamblesë, duke deklaruar se ai ishte drejtues politik i qarkut të Tiranës.

“Unë jam anëtar i Asamblesë Kombëtare, i Kryesisë së Partisë Socialiste, drejtues politik i qarkut Tiranë, kryetar i Partisë Socialiste Tiranë, si dhe kryetar i zgjedhur i Bashkisë Tiranë. Për rrjedhojë, pjesëmarrja ime në këtë mbledhje lidhet drejtpërdrejt me ushtrimin e të drejtave që më burojnë nga anëtarësia dhe funksionet e mia në organet drejtuese të partisë”, thuhej në letrën e Veliajt.

Prania e saj në rreshtin e parë vjen në një kohë kur Balluku ndodhet në qendër të një prej çështjeve më të bujshme të drejtësisë, pas hetimeve të SPAK dhe akuzave që lidhen me procedurat e tenderëve publikë.

Pavarësisht zhvillimeve në hetimin ndaj saj dhe debatit politik që ka shoqëruar këtë çështje, Balluku është shfaqur mes figurave kryesore të Partisë Socialiste në mbledhjen e sotme, ku Edi Rama pritet të përcjellë mesazhe për drejtimin dhe organizimin e forcës politike.