Putin paralajmëron Perëndimin: Nëse pas paqes vendosen trupa të NATOS në Ukrainë, do konsiderohen objektiv legjitim

Presidenti i Rusisë, Vladimir Putin, ka paralajmëruar se luftimet në Ukrainë do të rifillonin menjëherë nëse, pas arritjes së një marrëveshjeje paqeje, vendet perëndimore do të dërgonin trupa në territorin ukrainas.

Deklarata u bë gjatë takimit që Putin zhvilloi në Kremlin me të dërguarit e posaçëm të presidentit amerikan Donald Trump, Steve Witkoff dhe Jared Kushner. Bisedimet zgjatën rreth dy orë e gjysmë.

Në takim morën pjesë gjithashtu ndihmësi presidencial rus Yuri Ushakov, kreu i delegacionit rus për negociatat me Ukrainën, Vladimir Medinsky, si dhe drejtori i Fondit Rus të Investimeve Direkte, Kirill Dmitriev.

Sipas deklarimeve të transmetuara nga agjencia ruse TASS, Putin tha se Moska do ta konsideronte praninë e trupave të huaja në Ukrainë një objektiv të ligjshëm ushtarak.

“Për ne, ky është një objektiv legjitim, që do të thotë se lufta do të rifillojë menjëherë”, deklaroi lideri rus, duke iu referuar planeve të vendeve evropiane për të dërguar trupa në Ukrainë pas një marrëveshjeje paqeje.

Gjatë takimit, Putin u ndal edhe te mundësia e organizimit të një operacioni humanitar për çminimin e zonës pranë qytetit të Konstantinovkës. Ai pretendoi se Rusia e kontrollon këtë qytet dhe tha se për pastrimin e minave do të nevojiteshin rreth pesë ditë.

Presidenti rus propozoi që operacioni të zhvillohej nën mbikëqyrjen e komisioneres ruse për të drejtat e njeriut, Yana Landratova, dhe Avokatit të Popullit të Ukrainës, Dmytro Lubynets. Sipas tij, pala ruse është e gatshme të garantojë sigurinë e misionit.

“​​Nëse, siç pretendojnë autoritetet ukrainase, ata e kontrollojnë këtë qytet, le të sigurojnë sigurinë e tyre”, u shpreh Putin.

Ai përmendi gjithashtu një operacion të mëparshëm humanitar në Oleski, në rajonin e Khersonit, të cilin e cilësoi si shembull pozitiv bashkëpunimi me palën ukrainase. Në këtë kontekst, Putin falënderoi edhe Zonjën e Parë të SHBA-së, Melania Trump, për rolin e saj në organizimin e këtij procesi.

Paralajmërimi për trupat perëndimore mbetet një nga çështjet kryesore të debatit mbi garancitë e sigurisë për Ukrainën pas luftës. Moska kundërshton vendosjen e forcave të huaja në territorin ukrainas, ndërsa një prani e tillë është diskutuar nga vendet evropiane si pjesë e një mekanizmi të mundshëm për të parandaluar rifillimin e konfliktit./Cogito/