VIDEO - Studentët zhvendosen në Bulevardin “Bajram Curri”, kërkojnë dorëheqjen e Ramës

Ka nisur protesta e radhës para Ministrisë së Arsimit në Tiranë, në ditën e 168-të të qëndresës kundër qeverisë dhe kryeministrit Edi Rama. Studentët janë mbledhur sërish përpara institucionit, duke mbajtur në duar pankarta dhe duke përsëritur thirrjet për dorëheqjen e kryeministrit. “Tik-tak, koha juaj po mbaron”, shkruhet në njërën prej pankartave që mban një student, ndërsa një tjetër protestues mban në duar mesazhin e përditshëm të lëvizjes: “Dorëheqje!”. Kërkesa u drejtohet drejtpërdrejt kryeministrit Edi Rama. Protesta e sotme është pjesë e strategjisë së re të organizatorëve për zhvillimin e dy tubimeve kombëtare çdo javë, të mërkurën dhe të shtunën, me nisje në orën 14:00 përpara Ministrisë së Arsimit. Kjo mënyrë organizimi u bë publike pas më shumë se 150 ditësh protestë dhe synon të mbajë aktive lëvizjen dhe mobilizimin e studentëve e mbështetësve të tyre.

Ajo që nisi fillimisht si një lëvizje me kërkesa për përmirësimin e kushteve në universitete, problematikat e arsimit dhe perspektivën e të rinjve, mori një tjetër dimension pas përplasjeve të 13 tetorit. Që prej asaj kohe, kërkesa për dorëheqjen e Edi Ramës është kthyer në një prej thirrjeve kryesore të protestuesve.

Studentët kanë mbajtur një qëndrim të prerë, duke e cilësuar largimin e kryeministrit si të panegociueshëm dhe duke kundërshtuar ofertat e qeverisë për dialog. Gjatë protestave janë dëgjuar vazhdimisht slogane si “Rama jep dorëheqjen”, “Pa rini nuk ka Shqipëri”, “Studentët kërkojnë revolucion”, “Rama në burg, Berisha në burg” dhe “Diploma nuk është biletë emigrimi”.

Paralelisht me tubimet në sheshet e Tiranës, studentët kanë vijuar edhe bojkotin e procesit mësimor, ndërsa lëvizjes i janë bashkuar pedagogë, prindër dhe qytetarë nga qytete të ndryshme të vendit. Megjithatë, në disa universitete procesi mësimor është rikthyer në normalitet.

Nga ana tjetër, kryeministri Edi Rama ka përsëritur ftesat për dialog me studentët, por këto oferta nuk kanë sjellë deri më tani ndryshim të qëndrimit të organizatorëve, të cilët vijojnë të këmbëngulin se dorëheqja e tij mbetet kërkesa kryesore. Me pankarta që përcjellin mesazhe të drejtpërdrejta ndaj qeverisë dhe me thirrjen “Dorëheqje” në qendër të tubimit, studentët janë rikthyer sërish para Ministrisë së Arsimit, duke vijuar protestën që sot shënon ditën e 168-të.