Bordi i Transparencës ndryshon çmimet e naftës dhe benzinës, ja sa do të shiten nga sot

Sipas vendimit të Bordit, nafta (gazoili) do të shitet me pakicë jo më shumë se 216 lekë për litër, ndërsa çmimi i shitjes me shumicë do të jetë deri në 204 lekë për litër.

Ndërkohë, për benzinën është vendosur një çmim maksimal prej 172 lekësh për litër në pakicë dhe 160 lekësh për litër në shumicë.

Çmimet e reja hyjnë në fuqi sot, më 4 nëntor, në orën 14:00 dhe do të mbeten në fuqi deri në mbledhjen e ardhshme të Bordit, ku do të shqyrtohen sërish ndryshimet në tregun e hidrokarbureve.

Bordi u ka rikujtuar operatorëve të tregtimit të karburanteve detyrimin për zbatimin e çmimeve të përcaktuara, duke paralajmëruar se në rast konstatimi të shkeljeve do të vendoset pezullimi i aktivitetit.

Vendimi vjen në kuadër të masave të ndërmarra nga qeveria për përballimin e situatës së veçantë në tregun e hidrokarbureve dhe mbrojtjen e konsumatorëve shqiptarë.