Rama përsërit thirrjen për dialog, studentët kërkojnë dorëheqjen e tij. Vijon bojkoti i mësimit në Universitete

Përmes një publikimi në rrjetet sociale, kreu i qeverisë ka ndarë sërish fotografinë e tryezës prej guri, ku ka vendosur shënimet me mbishkrimin “Dialog”, duke përcjellë mesazhin se mbetet i hapur për komunikim me studentët.

Megjithatë, protestuesit kanë refuzuar deri më tani ftesat e kryeministrit, duke këmbëngulur se kërkesa e tyre kryesore është dorëheqja e Ramës.

Protestat vijojnë prej disa javësh në kryeqytet, ku studentët organizojnë marshime në rrugët e Tiranës dhe ndalesa pranë fakulteteve të ndryshme, me synimin për të zgjeruar mbështetjen për lëvizjen e tyre.

Në krah të tyre janë bashkuar edhe pedagogë, të cilët kanë shprehur publikisht solidaritetin me protestuesit.