Zgjedhjet vendore 2027/ PD nis seleksionimin e kandidatëve për bashkitë, deputetët dhe kryebashkiakët aktualë kalojnë automatikisht në fazën tjetër

Nisma do të shtrihet në të gjitha degët e Partisë Demokratike në vend. Përzgjedhja nuk do të kufizohet vetëm te anëtarët dhe drejtuesit e strukturave partiake. Në proces parashikohet të përfshihen edhe mbështetësit, simpatizantët, përfaqësues të shoqërisë civile, akademikë, profesionistë dhe komunitetet lokale.

Sipas udhëzimit, synimi është evidentimi i individëve me integritet të lartë moral dhe profesional, reputacion të pacenuar dhe angazhim të dëshmuar në jetën publike. Një rëndësi e veçantë do t'u kushtohet edhe kontributeve të kandidatëve në Partinë Demokratike apo në kauza qytetare.

Komisioni me pesë anëtarë do të shqyrtojë kandidaturat

Për vlerësimin e emrave të propozuar do të ngrihet një Komision Seleksionimi i përbërë nga pesë anëtarë. Ky mekanizëm do të shqyrtojë kandidaturat dhe do t'i përcjellë Kryesisë së Partisë Demokratike rekomandimet për emrat që përmbushin kriteret e përcaktuara.

Një element i veçantë i procedurës lidhet me deputetët e Partisë Demokratike dhe kryetarët aktualë të bashkive. Sipas udhëzimit, këto dy kategori konsiderohen automatikisht të kualifikuara për të vijuar në fazat e mëtejshme të procesit, pa iu nënshtruar seleksionimit paraprak.

Propozimet nga strukturat dhe vetëkandidimi

Procedura u jep mundësi strukturave të partisë të propozojnë emra për garën vendore, por parashikon edhe të drejtën e vetëpropozimit nga personat e interesuar.

Dokumentacioni përkatës duhet të depozitohet pranë sekretariatit të PD-së, sipas procedurave të përcaktuara në udhëzim.

30 nëntori, afati i fundit për propozimet

Të gjitha degët e Partisë Demokratike duhet të përmbyllin mbledhjen e propozimeve deri më 30 nëntor 2026.

Ky afat shënon përfundimin e fazës së grumbullimit të kandidaturave, ndërsa më pas emrat do t'i nënshtrohen procedurës së vlerësimit nga Komisioni i Seleksionimit.

Procesi përbën hapin e parë organizativ të PD-së drejt zgjedhjeve vendore të 9 majit 2027, ku partia do të përcaktojë kandidatët që do të përfaqësojnë atë në garën për drejtimin e bashkive./Cogito/