Kurti takon Mark Rutten në Dublin: Kosova synon afrimin me NATO-n, kërkon zgjerimin e bashkëpunimit me KFOR-in

Kryeministri i Kosovës, Albin Kurti, zhvilloi një takim me sekretarin e përgjithshëm të NATO-s, Mark Rutte, në Dublin të Irlandës, në kuadër të Samitit të nëntë të Komunitetit Politik Evropian.

Në qendër të bisedës ishte bashkëpunimi ndërmjet institucioneve të Kosovës dhe misionit paqeruajtës të NATO-s në Kosovë, KFOR. Palët diskutuan mundësitë për zgjerimin dhe intensifikimin e këtij bashkëpunimi, si dhe zhvillimet e fundit politike dhe të sigurisë në rajon.

Përmes një postimi në rrjetet sociale, Kurti bëri të ditur se gjatë takimit me kreun e NATO-s kishte vënë theksin te rëndësia e një ndërveprimi më të ngushtë me KFOR-in, në funksion të ruajtjes së stabilitetit dhe sigurisë.

Një tjetër çështje e rëndësishme e diskutimit ishte perspektiva euroatlantike e Kosovës. Kreu i qeverisë në Prishtinë deklaroi se integrimi në Aleancën Veri-Atlantike vazhdon të jetë një prej prioriteteve strategjike të vendit.

Sipas Kurtit, anëtarësimi i Kosovës në NATO do të kontribuonte në garantimin e paqes dhe sigurisë afatgjatë, jo vetëm në Ballkanin Perëndimor, por edhe në pjesën tjetër të Evropës.

“Për ne anëtarësimi në Aleancën Veri-Atlantike është prioritet strategjik, jetësimi i të cilit do t’i shërbente paqes së qëndrueshme dhe sigurisë afatgjatë në Ballkanin Perëndimor dhe mbarë kontinentin. Ndërsa angazhimi i NATO-s në rajon mbetet i rëndësishëm përballë rreziqeve dhe ndikimit të aktorëve të jashtëm”, shkroi Kurti.

Kryeministri kosovar vlerësoi gjithashtu rolin e NATO-s dhe të KFOR-it në ruajtjen e sigurisë rajonale, duke nënvizuar rëndësinë e vazhdimit të angazhimit të Aleancës përballë sfidave dhe ndikimeve të jashtme.

Takimi në Dublin zhvillohet në një moment kur çështjet e sigurisë evropiane dhe stabilitetit në Ballkanin Perëndimor mbeten në fokus të diskutimeve ndërkombëtare./Cogito/